УБ хот дахь Говь-Алтай аймгийн Монголын залуучуудын холбооноос бизнес эрхлэгчдийн “ХЯЗГААРАА ТЭЛ” эвент, уулзалтыг 2022 оны тавдугаар сарын 14-нд зохион байгууллаа. 

       Уг уулзалт Бизнес эрхлэгчдийг хооронд нь танилцуулах, хамтран ажиллах үүд хаалгыг нээх, бизнесийн хамтын өсөлтийг бий болгох, олон нийтэд бизнесээ сурталчлах, бизнес эрхлэгчдэд тулгамдаж буй асуудлуудыг тодорхойлох, хамтдаа гарц шийдэл, боломжийг эрэлхийлэхэд чиглэсэн юм.

Уулзалтад Говь-Алтай аймаг болон Улаанбаатар хотод бизнесийн үйл ажиллагаа явуулдаг 30 гаруй салбарын 100 орчим бизнес эрхлэгчид оролцлоо.

   УБ хот дахь Говь-Алтай аймгийн Монголын залуучуудын холбооны тэргүүн Д.Нармандах нээж үг хэлэхдээ “Анх удаагаа Говь-Алтай аймгийн уугуул, суугуул, харьяат залуу бизнес эрхлэгч нар нэг дор уулзаж байна. Энэ бол бизнесийн хамтын түншлэлийг эхлүүлэх боломж бөгөөд бизнес эрхлэгчдийн нэгдлийг бий болгох эхлэл юм. Бусдынхаа бизнесийг дэмжиж, хамтарч, бизнесийн хамтрагчаа өргөжүүлэхэд “Хязгаараа тэл” уулзалтын зорилго чиглэж байгаа. Та бүхэндээ амжилт хүсье” хэмээн онцоллоо. 

“ХЯЗГААРАА ТЭЛ” эвент гурван үе шаттай болсон бөгөөд эхний үе болох хэлэлцүүлэгт үндсэн илтгэгч болон зочин илтгэгч нар урилгаар оролцон, тодорхой сэдвээр илтгэл хэлэлцүүлсэн юм.

    Хэлэлцүүлгийн нэгдүгээр хэсэгт “U” фильма уран бүтээлийн нэгдлийн захирал, МУСГЗ, жүжигчин Г.Ундармаа “Би хэрхэн ажилладаг вэ?” сэдвээр, Монголын өмгөөлөгчдийн холбооны дэд ерөнхийлөгч Д.Баасанбат “Бизнесийн эрх зүй, гэрээний маргаан” сэдвээр, МУИС-ийн багш, доктор, дэд профессор Г.Уянга “Энтрепренер ба Сайн сайхан” сэдвээр, Эдийн засгийн сэтгүүлч, шинжээчдийн клубын ерөнхий зохицуулагч, сэтгүүлч Б.Баяртогтох “Эдийн засгийн дата, олон улс бүс нутаг дахь Монгол Улсын байр суурь” сэдвээр, Дэвшилтэт шинэ технологи, инновацийн хүрээлэнгийн захирал, доктор, дэд профессор Д.Энхжаргал “Төр, хувийн түншлэл, худалдан авах ажиллагаа” сэдвээр илтгэл хэлэлцүүлж, Төр.мн мэдээллийн сайтын захирал Б.Шүрэнцэцэг модератороор ажиллалаа. 

   Хэлэлцүүлгийн хоёрдугаар хэсэгт Аксиом Инк ХХК-ийн захирал, СЭЗИС-ийн багш Б.Нандин-Эрдэнэ “Зан үйлийн гажуудлыг маркетингийн шийдвэр гаргалтад ашиглах нь” сэдвээр, Тээвэр хөгжлийн банкны гүйцэтгэх захирлын орлогч, зохиолч Б.Эрхэмбаяр “Бизнесийн эрсдэл, эрсдлийн менежмент” сэдвээр, Startup Marketing space ХХК-ийн үүсгэн байгуулагч, ТУЗ-ийн дарга Ж.Золзаяа “Стартап эко систем” сэдвээр, Монголын залуучуудын холбооны дэд ерөнхийлөгч Н.Амартүвшин “Говь-Алтайд хөгжүүлэх боломжтой бизнесийн салбарууд” сэдвээр илтгэл хэлэлцүүлж, сэтгүүлч Ц.Нарантунгалаг модератороор ажиллав.

Хэлэлцүүлгийн үеэр бизнес эрхлэгчид сонирхсон асуултандаа хариулт авсны зэрэгцээ илтгэгч нараас зөвлөгөө, мэдээлэл авч, санал бодлоо солилцон, амжилттай бизнесээ удирдаж буй МЕНТОР-уудтай чөлөөт ярилцлага өрнүүлээ.

   “ХЯЗГААРАА ТЭЛ” уулзалтын хоёр дахь үед бизнес эрхлэгчид нэрийн хуудсаа солилцон, хоорондоо танилцан, чөлөөт уулзалтыг хийсэн бол гурав дахь үе буюу ENTERTAINMENT арга хэмжээнд Найруулагч Д.Отгонбаяр, жүжигчин Г.Эзэнмөнх, дуучин О.Баяржаргал, дуучин Л.Сүхбаатар, дуучин Дүүриймаа, Монголиа энтертайнмент бүжгийн хамтлаг, Амьд хөгжмийн C Art хамтлаг, дуучин П.Баярцэнгэл нар хүрэлцэн ирж мэндчилгээ дэвшүүллээ. Мөн “Ирээдүй Алтай” ОЗХ-ны тэргүүн, “Нийтийн тооллын өмнөх Ирээдүй” номын зохиолч, сэтгүүлч Т.Сайхнаа мэндчилгээ дэвшүүлэн, бизнес эрхлэгчидэд амжилт хүссэн юм. 

“ХЯЗГААРАА ТЭЛ” уулзалтад Говь-Алтай аймгийн Монголын залуучуудын холбооны баг, хамт олон 1000 км-ын замыг туулан уулзалтад оролцсон бөгөөд хэрэгжүүлэхээр төлөвлөж буй Залуусын цэцэрлэгт хүрээлэн, Залуусын гудамж төслөө танилцуулж нийт 105 мод /модны өндөр160-200см/, 30 мянган үрийг хамтдаа босгож чадлаа.

Уулзалтын ивээн тэтгэгчээр оролцсон Говь-Алтай аймгийн Тонхил сумын харьяат, “Цагаан Алтай” ХХК-ийн захирал Б.Өсөхбаяр /5 сая төгрөг/, Эрдэнэ сумын уугуул Лед мастер эвэнт ХХК-ийн захирал С.Алтайбаяр /лед дэлгэц/ нарт талархал илэрхийлье.

’ХЯЗГААРАА ТЭЛ" энтрепренер, бизнес уулзалт 100 орчим бизнесмэн залуучуудыг нэгтгэж, хамтын хүч, оролцоог хангах эхлэлийг тавьж чадлаа.