Цус сэлбэлт судлалын үндэсний төвийн санаачлагаар сайн дурын, авлагагүй, цусны донорын эгнээг өргөжүүлэх, цусны донорын үйлсийг сурталчлах, алдаршуулах, урамшуулах зорилготойгоор сар бүрийн 3-ны өдөр “Цусаа бэлэглэх өдөр” уриан дор зохион байгуулагддаг билээ. 

Тэгвэл өнөдөөр буюу 2022 оны 06-р сарын 03-ны өдөр зохион байгуулагдсан арга хэмээний үеэр  70 буюу түүнээс дээш удаа цус, цусны бүрэлдэхүүн хэсгээ бэлэглэсэн “Хүндэт донор Ц.Амарсанаа “ХҮРЭЛ ДОНОР” цол тэмдэг, “Хүндэт донор Б.Долгормаа “Бахархал 50”, Г.Гэлэгдорж, Б.Өнөрцэцэг нарт  ”Бахархал 40” тэмдэг. Мөн цусны донор Б.Хүдэртулга, Ч.Дхагвасүрэн, Т.Баярсайхан нарт “Бахархал 30” ”Бахархал 20”, “Бахархал 10” тэмдгийг ЦССҮТ-ийн ерөнхий захирал Б.Эрдэнэбаяр гардуулж баяр хүргэлээ. Болзол хангаж шагнагдсан доноруудыг ивээн тэтгэгч Хаан банк,  ULKER MONGOLIA брэндын гарын бэлэг, СҮҮ ХК өөрийн бүтээгдэхүүний дээжээр урамшуулж  хамтран ажиллаа.

ЦССҮТ-ийн ерөнхий захирал Б.Эрдэнэбаяр: “Цусны донор”-ын дэлхийн өдрийг 6-р сарыг 13-ны өдөр тэмдэглэнэ

Монгол улсад цусны алба үүсэж хөгжөөд 60 дахь жил рүүгээ золгож байна. Энэ хугацаанд 150:000 орчим цус өгсөн гэж тооцоолдог. Энэ жилийн хувьд өмнөх тоо үзүүлэлт нэмэгдсэн сайн мэдээтэй байна. Цус өгч байгаа хүмүүсийн дийлэнх нь залуучууд эзэлж байна. Ялангуяа 35 хүртэлх залуус 75 хувийг эзлээд байна. Энэ бол маш сайн үзүүлэлт. Дэлхийн эрүүл мэндийн байгууллагаас ялангуяа донорын эгнээнд залуучуудын эгнээг өргөжүүлэх уриалаг санаачлага байнга гаргадаг. Үүнд бид ч маш их ач холбогдол өгч ажилладаг. Мөн 50-аас дээш насны доноруудын эзлэх хувь жилээс жилд нэмэгдэж байна. Дашрамд дурдахад, жил бүрийн 6-р сарын 14-ны өдрийг “Цусны донор”-ын дэлхийн өдөр болгон тэмдэглэдэг. Энэ жилийн хувьд бүх нийтийн амралтын өдөр тохиож байгаа болохоор  06-р сарын 13-ны өдөр тэмдэглэхээр зохион байгуулж байна. Энэ өдөр дэлхий нийтээрээ тодорхой уриалгыг дэвшүүлэн тэмдэглэдэг.

Харин энэ жилийн хувьд “Цусаа өгч эв нэгдлийг илэрхийлцгээе” гэсэн уриан дор дэлхий нийтээрээ тэмдэглэх гэж байна. Манай улсын хувьд мөн л улс даяараа уг арга хэмжээг зохион байгуулахаар ажилдаа орсон байна. 

Энэ үеэр 35-аас дээш цусаа бэлэглэсэн хүндэт доноруудаа Монголын Улаан загалмайн нийгэмлэгийн “Хүндэт донор”-ын өргөмжлөл шагналаар шагнах юм. Мөн 2022 оны хувьд 165 донор 35-аас дээш удаа цусаа бэлэглэж хүндэт донорын эгнээнд нэгдэж байна. Өмнөх жилүүдэд байгаагүй үзүүлэлттэй байна. Энэ доноруудаа алдаршуулж урамшуулах ажлууд хийгдэхээр төлөвлөж байна.

Хүрэл донор Ц.Амарсанаа: “Топ донор” болох зорилготой байгаа

Анх 2011 онд 8 сарын 29-ны өдөр цусаа өгч байсан. Тэр өдөр хүргэн ахдаа цусаа бэлэглэж буян болж байсан өдөр юм. Үүнээс хойш 11 жилийн турш нийт 70 удаа цусаа өгч 210 хүний амь аварсан байна. Эргээд бодоход өөрөөрөө маш их бахархаж байна.

Би одоо 30 настай. Анх 2016 онд “Хүндэт донор” болж байсан. Харин одоо 2022 онд “Хүрэл донор” болж байна. Цаашдаа “Топ донор” болох зорилготой байгаа.

Би Монгол улсын зэвсэгт хүчинд ажилладаг. Манай байгууллагын хамт олон цус хандивлах аянд маш их идэвхтэй хамрагддаг. Тэр дундаа залуучууд нь жилээс жилд идэвхтэй хамрагдаж шинэ залуу донорууд бий болсоор байна. Байгууллага хамт олноороо маш их бахархаж байна. Залуустаа гэж хэлэхэд: “Цус хандивлах үйлсэд идэвхтэй хамрагдаж байгаараа. Таны болон бусдын биед ямар их үнэтэй хувь нэмэр оруулж байгаагаа та мэдэх болно. Бусдад буян болоорой” гэж хэлмээр байна.

“Бахархалт 30” тэмдэгт Б.Хүдэртулга: Монгол улсынхаа нийгмийн хөгжилд багахан хувь нэмэр оруулж байгаа болов уу, гэж боддог

Анх жолооны үнэмлэх авах үед цусны бүлгээ тогтоолгохдоо цусаа өгч байсан. Дараа нь “Цус сэлбэлт судлалын үндэсний төв”-ийн үндсэн үйл ажиллагаатай танилцаад цус өгч байя гэх сэдэл төрсөн юм. Одоогийн байдлаар 30 удаа өгч 100 орчим хүнийг аварсан байна. Бусдад өөрийнхөө чадах зүйлээрээ тус болж буян болж байгаадаа маш их баярлаж явдаг. Донор хүн гэдэг эрүүл мэнд, зөв хооллолт зөв дадал зуршилтай байх ёстой. Тиймдээ ч Монгол улсынхаа нийгмийн хөгжилд багахан хувь нэмэр оруулж байгаа болов уу, гэж боддог.

Цусаа хандивлах үйлсэд ганцхан өөрөө өгөөд болох биш ажлын хамт олон, найз нөхөд ойр дотнын хүмүүстээ уриалж нөлөөлөхийг их хүсдэг. Өөрийнхөө хүрээнд сурталчилж таниулж явдаг даа.

Бусдын амь аврах, эрүүл мэндийг дэмжих энэрэнгүй хүмүүнлэг үйлсийн эзэд эрхэм доноруудаа талархал илэрхийлж, нийт ард иргэд, байгууллага хамт олныг цусны донорын эгнээнд нэгдэхийг “Цус сэлбэлт судлалын үндэсний төв”-өөс уриалж байна.