Сайдад горилогч УИХ-ын гишүүн Н.Учрал “ХҮНЭЭ ШУРГУУЛААД” эхэлжээ

Админ I Төр.мн

2022-06-03

Өнгөрсөн 2021 оны төгсгөлд Засгийн газарт хоёр яам ЗАЙЛШГҮЙ ХЭРЭГТЭЙ гээд Эдийн засаг, хөгжлийн яам, Цахим хөгжил, харилцаа холбооны яам байгуулж байлаа. Түүнээс хойш хагас жил өнгөрчхөөд байхад яам нь сайдгүй, толгойгүй явсаар.

Сайдыг нь томилъё гэхээр гишүүн бус ДАН ДЭЭЛТНИЙГ томилох хуультай.

Гэтэл гишүүн сайд болох асар олон УИХ-ын гишүүд нүдээ өгөхөөс буцахгүй ордноор гүйлдэж байна. Иймээс энэ зургадугаар сард Үндсэн хуульд өөрчлөлт оруулж, сайд хийх давхар дээлтний квотыг нэмэгдүүлэхийг хүлээж буй.

Цахим хөгжил, харилцаа холбооны яамыг Н.Учралд “ЗОРИУЛАН” байгуулав

Анх удаагаа Их хурал Инновац, цахим бодлогын байнгын хороог байгуулж даргаар нь УИХ-ын гишүүн Н.Учрал ажиллаж буй. Түүний хувьд өмнөх Засгийн газарт хэдийнэ сайд болох тохироогоо хийж, багаа хүртэл бүрдүүлсэн ч биеийн байдлаас болж энэ асуудал хойшилсон гэлтэй. Харин одоо шинээр байгуулагдсан Цахим хөгжил, харилцаа холбооны сайдаар УИХ-ын гишүүн Н.Учрал “НОГООН ГЭРЭЛ”-ээр томилогдох нь. Зөвхөн Үндсэн хуульд өөрчлөлт оруулахыг л хүлээж байна. Тэгвэл хоёронтой сонгогдсон гишүүн Н.Учрал энэ тэнд “ХҮНЭЭ БАЙРШУУЛААД” эхэлсэн байна. Гэхдээ түүний байршуулж буй залуус нь мэдлэг, ур чадвар “МУУ” аж.

Түүний нэг нь А Cool буюу дуучин Б.Анхбаяр. Тэрбээр саяхан Н.Учралын “томилгоогоор” Шүүхийн шийдвэр гүйцэтгэх ерөнхий газар (ШШГЕГ)-ын харъяа "Соёмбо" чуулгын даргаар томилогдоод байгаа.

Өнгөрсөн дөрөвдүгээр сард офицерын курс төгсөж, хошууч цолтойгоор уг албан тушаалд очжээ.

А Cool буюу дуучин Б.Анхбаяр УИХ-ын гишүүн Н.Учралын “хүн”. Тэрбээр Их засаг их сургуулийн маркетингийн албаны даргаар ажилладаг байв. Мөн Н.Учралын "Рояал HD" телевизэд нэг хэсэг нэвтрүүлэг ч хөтөлдөг байсан удаатай. Гэр бүлийн найзууд, дотны нөхөр. Төрийн алба тэр дундаа урлаг соёлын газруудад дуулаад ч дуу нь "явахгүй" цаашдын урлагийн карьер нь "дуусаж" буй хүмүүсийг чихдэг газар болох нь ээ.

Гишүүд төрийн албыг төрлийн алба болгож ах дүү, амраг, садангаа хүртэл Төрд шургуулдаг нь нууц биш. Тэгвэл Н.Учрал тэдний л адил нэгэн бололтойдог. Найзуудаа хүртэл албан тушаалд ээлж дараалан шургуулсаар байна.

Н.Учрал нь сайдаар томилогдоход гологдоод байх хүн биш. Гэхдээ түүнд асар их ашиг сонирхлын зөрчил байж мэднэ.

Учир нь 2019 оны есдүгээр сард Мэдээлэл харилцаа холбооны үндэсний ассоциацийн ерөнхийлөгчөөр Н.Учрал сонгогдсон байдаг. Уг хурлын процесс анхаарал ч татна. Учир нь 2019 оны тухайн үеийн хурлаар Харилцаа холбооны зохицуулах хорооны дарга Г.Чинзориг уг албан тушаалд нэр дэвшиж өрсөлдөж байгаад нэрээ татан УИХ-ын гишүүн Н.Учралын нэрийг дэвшүүлснээр тэрбээр ерөнхийлөгчөөр сонгогдсон юм.

Харилцаа холбооны зохицуулах хорооны дарга Г.Чинзориг нь Н.Учралын “Хүн” гэгддэг бөгөөд тэд нэг “БАГ” юм. Тэгвэл Цахим хөгжил, харилцаа холбооны яамыг Н.Учрал толгойлно гэвэл асар их АШИГ СОНИРХОЛ тэнд явагдаж мэдэх аж.

Төр.мн
Б.БАДАРЧ

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.