Уран үгээр рекламдаж, утсаар завсар зайгүй ярьж ДААТГАЛД хамруулдаг шигээ нөхөн төлбөрийг тэд өгдөг болов уу?
Даатгалын компаниуд гэж хамгийн их ашиг хүртдэг газар. Ингэж хэлэхийн учир өнөөдөр жолооч бүр жолоочийн хариуцлагын даатгалыг албан хүчээр төлдөг, түүнчлэн автомашины даатгал, эд хөрөнгийн даатгал, бүр амь насны даатгал хүртэл хийлгэх болсон.
Тэгвэл нөхөн төлбөр өгөх дээрээ тулахаар “ЛУУ УНЖДАГ” даатгалын компанийн талаар энд дурдах гэж байна.
Энэ бол МИГ даатгал. МИГ даатгалд жолоочийн хариуцлагын, эд хөрөнгө, жолоочийн эрүүл мэнд, амь насны даатгалд хамрагдсан нэгэн иргэн байгалийн хүчин зүйлээс болж эд хөрөнгөд учирсан хохиролдоо ДААТГУУЛААД ч нөхөн төлбөр авч чадахгүй байгаа талаар манай редакцид хандлаа.
Иргэн А.Отгонжаргал өнгөрсөн дөрөвдүгээр сард автомашин худалдаж авах үедээ Авто тээврийн үндэсний төвийн ажилтнуудын зөвлөснөөр МИГ даатгалд даатгуулжээ. Ингэхдээ зөвхөн жолоочийн хариуцлагын даатгалаас гадна эд хөрөнгө, жолоочийн эрүүл мэнд, амь насны даатгалд хамрагдсан байна. Ингэж даатгуулахдаа байгалийн болон бусад гадны хүчин зүйлээс болж эд хөрөнгөд үүсэх хохиролоос урьдчилан сэргийлсэн нь тэр.
Гэтэл өнгөрсөн долдугаар сард зогсоолд тавьсан автомашиных нь их гэрлийн шүршигчийн тагийг хулгайд алдаж даатгалын компанид хандахад “Таны хувьд амгалан даатгалын үйлчилгээ авсан тул даатгалын үйлчилгээ авахгүй” гэх тайлбарыг өгчээ.
Ингээд иргэн даатгуулсан ч нөхөн төлбөр авч чадаагүй тул өөрөө 250 мянган төгрөгөөр хулгайд алдсан эд зүйлээ худалдан авчээ.
“Энэ зун Дорнод аймагт явж байхдаа шаварт суун автомашин нь бөөрөөрөө хэвтсэн. Энэ үед автомашины будаг халцарч, жижиг, сажиг гэмтэл гарсан. Ингээд хотод ирсэн даруйдаа МИГ даатгалын дуудлагын мэргэжилтэнг дуудаж, автомашинаа харуулахад байгалийн хүчин зүйл учирсан тул манай даатгал танд бүрэн үйлчилнэ гэж хэлээд явсан. Гэвч даатгалын компаниас эргэн холбогдоогүй. Өөрөө очиж уулзахад эрсдэл үүссэн гэж үзэхгүй тул танд нөхөн төлбөр өгөхгүй гэсэн” хэмээн иргэн А.Отгонжаргал ярилаа.
Өөрөөр хэлбэл эд хөрөнгөө даатгуулсан ч элдэв шалтаг, шалтгаан гаргаж аль болох нөхөн төлбөр өгөхгүй байх арга хайдаг МИГ даатгалын нэг бодит жишээ энэ болж байна. Энэ мэт хичнээн мянган иргэдэд шалтаг, шалтгаан тоочиж НӨХӨН ТӨЛБӨРӨӨС зугтсан бол?
Үйлчилгээ муу, иргэдийг хохироож, чирэгдэл учруулдаг, харилцааны соёлгүй гэх МИГ даатгалтай байгуулсан гэрээгээ цуцлахад 214 мянган төгрөгийн даатгалын үйлчилгээний буцаан олголт гэж 87 мянга 249 төгрөг өгөхөөр болсон байх юм. Даатгалын гэрээ байгуулаад 5 сар ч болоогүй, нэг ч үйлчилгээ аваагүй байхад гэрээ цуцалсан хэмээн 120 мянга гаруй төгрөгийг тус иргэнээс суутган авсан байна. МИГ даатгал юу даатгаж, ямар үйлчилгээ үзүүлсэн болоод 50 гаруй хувийг суутган авав! Нөхөн төлбөр өгдөггүй атал суутган төлбөрт ингэж авсан нь шууд “ЛУЙВАР” гэж харагдахаар байгааг иргэн А.Отгонжаргал илэрхийлэв.
Иргэд аливаа гарах эрсдэл, хохирлоо барагдуулах гэж л даатгалд хамрагддаг. Гэтэл МИГ даатгал шиг газрууд үйлчлүүлэгчдээ хохироосоор байна...
Төр.мн
Like
1
Зөв
0
1
Буруу
0
Воов
1
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
