Монгол улсын Засгийн газар шинэ хоёр яамаар хүч сэлбэж байна. Ингэхдээ Ерөнхий сайдын гол чиглэл болгож буй Цахим үндэстнийг бий болгох чиглэлийн хүрээнд Цахим хөгжил, харилцаа холбооны яамыг байгууллаа.
Уг яам нь Бодлого төлөвлөлтийн газар, Цахим хөгжлийн бодлогын хэрэгжилтийг зохицуулах газар, Харилцаа холбооны бодлогын хэрэгжилтийг зохицуулах газар, Кибер аюулгүй байдлын бодлогын хэрэгжилтийг зохицуулах газар, Төрийн захиргааны удирдлагын газар, Хяналт-шинжилгээ, үнэлгээ, дотоод аудитын газар гэсэн зургаан газар, найман хэлтэстэй, нийт 87 орон тоотой байх юм.
Дэлхий нийт тэр чигтээ цахимжиж, төр хувийн хэвшилгүй бүгд цахим орчинд үйлчилгээгээ хүргэж байна. Монгол улс энэ хөгжлөөс хоцрох ёсгүй. Иймд анх удаагаа цахим хөгжлийн яамыг байгуулав. Тэгвэл уг яамыг хэн удирдах нь анхаарал татна.
Олон нийтэд “Засгийн гүнж” хэмээн нэрлэгдээд буй Харилцаа холбоо, мэдээлэл технологийн газрын дарга Б.Болор-Эрдэнийг уг яамны төрийн нарийн бичгийн даргын үүрэг гүйцэтгэгчээр томилоод байгаа нь олон нийтийн эсэргүүцэлтэй тулаад буй.
Учир нь төрийн захиргаанд ажиллаж байсан туршлагагүй, хоёрхон жил төрд ажиллаж буй түүнийг ийм өндөр албан тушаалд томилсон нь Төрийн албаны тухай хуулийг зөрчсөн, мерит зарчмыг үгүйсгэсэн үйлдэл болсон юм. Гэхдээ уг яамны сайдыг нь томилсны дараа эргүүлэн татаж мэдэх. Энэ томилгоог түр орхиод ногоон гэрлээр сайдаар томилогдох хүний тухай товч сийрүүлье.
Мөн л анх удаагаа их хурал Инновац, цахим бодлогын байнгын хороог байгуулж даргаар нь УИХ-ын гишүүн Н.Учрал ажиллаж буй. Түүний хувьд одоогийн Засгийн газарт хэдийнэ сайд болох тохироогоо хийж багаа хүртэл бүрдүүлсэн ч биеийн байдлаас болж энэ асуудал хойшилсон гэлтэй.
Харин одоо шинээр байгуулагдсан Цахим хөгжил, харилцаа холбооны сайдаар УИХ-ын гишүүн Н.Учрал “НОГООН ГЭРЭЛ”-ээр томилогдох нь. Учир нь 2 ба түүнээс дээш сонгогдсон зарим гишүүд сайд болохоор санаархаж лобби хийж байгаа ч энэ яамтай тэр дундаа Н.Учралтай өрсөлдөж, сайдын суудлыг булаацалдахгүй гэж нэрээ татаж байгаа сурагтай.
Н.Учрал нь сайдаар томилогдоход гологдоод байх хүн биш. Гэхдээ түүнд асар их ашиг сонирхолын зөрчил байж мэднэ. Учир нь 2019 оны есдүгээр сард Мэдээлэл харилцаа холбооны үндэсний ассоциацийн ерөнхийлөгчөөр Н.Учрал сонгогдсон байдаг. Уг хурлын процесс нь анхаарал татдаг. Учир нь 2019 оны тухайн үеийн хурлаар Харилцаа холбооны зохицуулах хорооны дарга Г.Чинзориг уг албан тушаалд нэр дэвшиж өрсөлдөж байгаад нэрээ татан УИХ-ын гишүүн Н.Учралын нэрийг дэвшүүлснээр тэрбээр ерөнхийлөгчөөр сонгогдсон юм.
Харилцаа холбооны зохицуулах хорооны дарга Г.Чинзориг нь Н.Учралын “Хүн” гэгддэг бөгөөд тэд нэг “БАГ” юм.
Төр.мн
Like
1
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
