Хуульчдын холбоонд заларсан эрхмүүдийн хууль бус үйлдэл буюу ТОНОГЧДЫН тухай баримтыг Төр.мн сайт цувралаар та бүхэнд хүргэж байна. Түүнчлэн баримт түшиглэн тусгай нэвтрүүлэг бэлтгэж буйг энд дурдая. Ингээд Хуульчдын холбоог тоногчдын тухай цөөн баримтыг дор сийрүүллээ.
Монголын Хуульчдын холбоо нь төсөв бүрдүүлдэг хуульчиддаа хамгийн ээлтэй, чанартай үйлчилгээ үзүүлэх учиртай. Харамсалтай нь тухайн байгууллагад үеийн үед хууль бус аргаар сонгогдсон Ерөнхийлөгч болон Тамгын дарга, дэд дарга, санхүүгийн албатайгаа үгсэн хуйвалдаж татварын мөнгийг ёроолгүй сав мэт урсгадаг, халаасаа зузаатгадаг жишиг тогтоод удаж байна.
Тухайлбал, зарим эх сурвалжийн өгч буй баттай мэдээллээр ХЭҮК-ийн даргаар түр тавигдсан Ж.Хунан, өнөөгийн Хуульчдын холбооны дэд дарга Ш.Жолбарс нар нь багийн системээр ажиллаж нэгнийгээ дэмжин ашиг сонирхлын зөрчилтэй ажилладаг тухай олон баримтын зах зухаас дурдъя. Тус холбооны хамгийн чухал чиг үүргүүдийн нэг Хуульчийн шалгалт, сургалт, ном хэвлэх, хурал зөвлөгөөн зэрэг бүхий л арга хэмжээний үеэр өөрсдийн хувийн эзэмшлийн газруудаасаа үйлчилгээ авдаг тухай баримт байна. Ганц жишээ дурдахад л дэд дарга Ш.Жолбарс нь шалгалт, сургалт, үйл ажиллааны үеэр өөрийн эхнэрийн рестораны амт чанаргүй хоолыг тэнгэрт хадсан үнэ ханшаар холбоондоо шахдаг болоод олон жилийн нүүрийг үзэж буй аж.
Түүнчлэн шалгалт зохион байгуулах газруудын эзэдтэй үгсэн хуйвалдаж хоногт 5-6 сая төгрөгөөр түрээсэлж шалгалт зохион байгуулдаг гэх мэтчлэн олон баримтууд хөвөрнө.
Ж.Хунангийн хувьд Монголын Хуульчдын холбоонд ажиллаж байхдаа гадаадад болж буй хуралд эхнэрээ дагуулан зугаацаж, хурал зохион байгуулах нэрийдлээр ашиг сонирхлын зөрчилтэй ажиллаж байсан, ХЭҮК-ийн гишүүн асан Оюунчимэгийн гарын хүн болох тухай баримтуудыг бид тусгай нэвтрүүлгээр дэлгэрүүлэн хүргэх болно.
Тэрбээр “ус үзээгүй гутал тайлах уул үзээгүй хормой шуух”-ын үлгэрээр ХЭҮК-т түр тавигдсан даруйдаа Хуульчдын холбоонд дадсан зангаараа өөрийн өрөөний тавилга, эд хогшилд 50 сая, компьютер, хэвлэгч авах нэрийдлээр 50 сая төгрөг нийт 100 сая төгрөгийг салхинд хийсгэсэн нь тус байгууллагын шилэн дансанд дурайж байна.
Уг нь Цар тахлын хүнд үед бүсээ чангалж, төсөв арвилах зорилгоор тогтоол хүртэл гарсныг үл ойшоосон нь олон хүний дургүйцлийг хүргэж байна.
Шинэ цагийн нийгэмд хуульчид бол шударга ёсыг тогтоох онцгой үүрэгтэй мэргэжил. Гэтэл хуулийн салбарын малгай байгууллагыг удирдаж байсан эрхэм Ж.Хунан болон өдгөө ч даргын сэнтийдээ амь бөхтэй шигдэж буй Ш.Жолбарс нар хэдэн зуун мянган өмгөөлөгчийн татвараар халаасаа зузаатгаж буй хууль зөрчсөн үйлдлийг холбогдох хууль хяналтын байгууллага, анхааралдаа авахыг сануулж байна. Бид энэ тухай дэлгэрэнгүй нэвтрүүлгийг уншигчид та бүхэнд тун удахгүй хүргэнэ.
Үргэлжлэл бий...
Сэтгүүлч Ч.Оюунсанаа
Like
0
Зөв
0
0
Буруу
0
Воов
0
Уйтгартай
0
Дуртай
© 2013-2023. Вэб сайт бүтээсэн: Tsast Solution LLC
