Ардчиллын эхний он жилүүдэд олон нам эвсэл байгуулагдах үед МУИС-ийн багш нар нэгдэн Монголын Социал Демократ Нам гэж байгуулж нарийн бичгийн даргаар нь Норовын Алтанхуяг томилогдож байв. Биофизикийн багш Н.Алтанхуягийн улс төрд орж хөл тавьсан эхлэн энэ. 

      2004 оны УИХ-ын сонгуульд М.Энхсайхнаар ахлуулсан Ардчилсан нам “Эх орон” намтай эвсэн оролцож тухайн үеийн МАХН-тай бараг ижил суудал авсан байдаг. Бараг тэнцүү суудал авсан учир нь МАХН-ын дарга Н.Энхбаяр УИХ-ын даргын суудлыг авч гүйцэтгэх засаглалын тэргүүний суудлыг Ардчилсан намын дарга М.Энхсайхан авах байв. Гэвч тэр үед нарийн бичгээр ажиллаж байсан Н.Алтанхуяг "хор" найруулж сонгуульд ямар ч оролцоогүй байсан Ц.Элбэгдоржийг Ерөнхий сайд болгосон байдаг.

Ингэж Н.Алтанхуяг болон Ц.Элбэгдорж нарын алтан ургийн хэлхээ холбогдсон түүхтэй. Ц.Элбэгдорж ерөнхий сайд болсон учир Н.Алтанхуягт шагнал бай олгогдох нь мэдээж. Тэр ч утгаар тухайн үеийн засгийн газрын Сангийн сайдын албан тушаалд биофизикийн багш мэргэжилтэй Н.Алтанхуяг томилогдож байлаа. 

Мэдээж М.Энхсайхан ерөнхий сайд болоогүй шалтгаан нь бас л Н.Алтанхуягтай холбоотой. Тэрбээр М.Энхсайханыг дараа жилийнх нь ерөнхийлөгчийн сонгуульд нэр дэвшүүлэн өрсөлдүүлнэ гэж хулхин дээр нь цэцэг ургуулж гал намжаасан байдаг. Гэвч 2005 оны ерөнхийлөгчийн сонгуульд Н.Алтахуяг, Ц.Элбэгдорж нарын "хор" гүйж Р.Гончигдорж нэр дэвшиж АН-ын дарга М.Энхсайхан ар нуруундаа "хутга шаалгуулж" амаараа шороо үмхэн хоцорсон түүхтэй. 

   Н.Алтанхуягийн "хор" үүгээр ч зогсохгүй. Тэрбээр М.Энхсайханаас намын даргын суудлыг нь булаан авч Ц.Элбэгдоржийг Ардчилсан намын дарга болоход нь хамгийн том үүрэг гүйцэтгэсэн гэдэг. Гэхдээ яагаад өөрөө намын дарга болоогүй вэ гэдэг асуулт гарч ирдэг. Шалтгаан нь 2008 оны сонгуульд ялагдах магадлал маш өндөр учир энэ хохиролыг өөр дээрээ авахыг тэр хүсээгүй юм.

Түүний төлөвлөгөө ч ёсоор болж 2008 онд Ардчилсан нам ялагдсан. Намаа ялагдалд хүргэсэн Ц.Элбэгдорж ажлаа өгөх нь гарцаагүй. Энэ үед Ц.Элбэгдорж, Н.Алтанхуяг нарын алтан ургийн хэлхээ дахин нөлөөлж Ц.Элбэгдорж намын даргын ажлаа Н.Алтанхуягт өгсөн байдаг. Үүнд нь Э.Бат-Үүлээс эхлээд ардчиллын алтан хараацайнуудын нөлөөлөл их байсан л байх. 
      Гэхдээ өөрийн нам дотроо дайсан олонтой Н.Алтанхуягт алтан хараацай яагаад дэм болов гэдэг асуулт бас л гарч ирнэ. Учир юу вэ гэхээр Н.Алтанхуяг нь Э.Бат-Үүлийг 2009 оны ерөнхийлөгчийн сонгуульд АН-аас нэр дэвшүүлэх ҮЗХ-ны хурал дээр дэмжих асуудал байлаа. Э.Бат-Үүл ч намын дарга Н.Алтанхуягт саналаа хэлж мань эр ч 100 хувь дэмжихээ илэрхийлж байв.

     Гэвч яндар дээрээ тийм биш байсан. Н.Алтанхуяг тээр жил М.Энхсайханыг амаар нь шороо үмхүүлсэн шигээ Э.Бат-Үүлийг бас л шороо үмхүүлсэн. Намын даргын суудал авч өгөлцсөн хоёр хүн энд байгаа гэдгийг мартаж болохгүй. Тэд бол Н.Алтанхуяг, Ц.Элбэгдорж нар юм. Хүний мөс маруухан, муу бүхний эхлэлийг тавигч ч гэсэн Н.Алтанхуягт нэг сайн тал байжээ.

Тэр нь ач санах ухаан байв. Тэрээр 2009 оны сонгуульд Э.Бат-Үүлийг биш намын даргын суудлаа өгч байсан Ц.Элбэгдоржийг нэр дэвшүүлсэн юм. 
Хожим Н.Алтанхуяг, Ц.Элбэгдорж нар Э.Бат-Үүлийгээ тайвшруулахын тулд Монголын түүхэнд анх удаа энх цагийн “Улсын баатар”-аар Э.Бат-Үүлийг тодруулан шагнасан байдаг. Үүндээ ч Э.Бат-Үүл сэтгэл ханамжтай үлдсэн. Сүүлд тэрбээр хотын мээр ч болсоныг бүгд мэднэ. Ц.Элбэгдорж , Алтанхуяг хоёрын нам дотроо үүсгэн бие биенээ гэсэн алтан хэлхээ 2012 онд улам төгөлдөршиж төрийн өмч рүү дайрч эхэлсэн. Яагаад 2012 он гэж. 2012 онд Н.Алтанхуяг Монгол улсын ерөнхий сайд, Ц.Элбэгдорж Монгол улсын Ерөнхийлөгч байсан. Энэ хоёр хүнийг юу ч зогсоож чадахгүй тийм л хүч, эрх мэдлийг хуримтлуулж чадсан байсан. 

 Тэд төрөөс хийх хулгайгаа Х.Баттулга болон Сахал Д.Эрдэнэбилэг нартай хамтран гүйцэлдүүлсэн байдаг. Ганцхан жишээ хэлье. 2009 онд ерөнхийлөгч болсон Ц.Элбэгдорж 2012 онд засгийн газрын мэдэлд байсан Төрийн Өмчийн Хороог Үйлдвэр,Хөдөө Аж Ахуйн яаманд шилжүүлэх саналыг тавьж ерөнхий сайд байсан Н.Алтанхуяг ч ёсоор болгосон байдаг.

Тухайн үед тус яамны сайдаар Х.Баттулга ажиллаж байсан юм. Нэг үгээр хэлбэл Монгол улсын төрийн бүх өмч Х.Баттулгын мэдэлд шууд хамааралтай болж эхэлсэн юм. 

Энэ үед Х.Баттулга нь Дарханы төмөрлөгийн үйлдвэрийг концессийн гэрээ гэгчээр халхавчлан Сахал Д.Эрдэнэбилэгийн хамаарал бүхий “Кью Эс Си” компанид үнэгүй шахам өгсөн байдаг. 

Энэ бол Н.Алтанхуягийн Цахиагийн Элбэгдорж, Халтмаагийн Баттулга, сахал гэгдэх Должингийн Эрдэнэбилэг нартай үгсэн хуйвалдаж төрөөс хэдэн их наядын хөрөнгө хулгайлсан урт түүхийн жим эхэлсэн юм. 

Үргэлжлэл бий...