Сэлэнгэ аймгийн засаг дарга Н.Лхагвадорж өөрийн тухлах ОРДНОО засах нь НЭН ЧУХАЛ ажил гэж үзжээ

Админ I Төр.мн

2022-05-24

Сэлэнгэ аймгийн засаг дарга Н.Лхагвадорж Нутгийн удирдлагын ордноо засаж, тохижуулахаар 350 сая төгрөгийн тендер зарлаад байна. УИХ, Засгийн газраас орон нутаг, дүүрэг, яам агентлагт чиглэл өгч тэвчиж болох зардлыг танаж, хэмнэлтийн горимоор ажиллахыг үүрэгдсэн. Харин эрхэм засаг ноён энэ бол “НЭН ШААРДЛАГАТАЙ АЖИЛ” хэмээн тендерийг яаравчлан зарласан нь энэ аж.

Нутгийн удирдлагын ордон нурж унах гэж байгаа барилга уу? Сэлэнгэ аймаг энэ мэт зардлыг тэвчиж болох байсан уу гэсэн асуудлаар Сэлэнгэ аймгийн Засаг даргын тамгын газрын Хөгжлийн бодлого төлөвлөлтийн хэлтсийн дарга Я.Мөрөнгөөс тодрууллаа.

Тэрбээр “Нутгийн удирдлагын ордон 1969 онд баригдсан барилга. Элэгдэл, хорогдолд орсон. 2008 онд их засвар орсон байдаг. Ингээд бид 2021 оны 12-р сарын 3-ны өдрийн Аймгийн Иргэдийн төлөөлөгчдийн хурлаар 350 сая төгрөгөөр Нутгийн удирдлагын ордны зөвхөн гадна фасад хийхээр төсвийг баталсан. Энэ дагуу тендер зарлаад явж байна. Засварын хүрээнд халаалт, шугам сүлжээ солино. Үүнийг бид нэн шаардлагатай ажил гэж үзэж байгаа” гэлээ.

Энэ сарын 15-нд Сэлэнгэ аймаг төсвийн тодотгол хийжээ. Угтаа төсвийн тодотголоор хэмнэж болох зардлыг хасаж болох байсан ч Нутгийн удирдлагын ордны гадна фасад хийх 350 сая төгрөгийн зардлыг хэмнэж “чадахгүй” гэж үзсэн аж. Сэлэнгэ аймгийн засаг дарга Н.Лхагвадорж, удирдлагууд өөрсдийнхөө суух ордонг аймгийн нэн чухал ажил гэж үзэж байгаа бол аймгийн иргэд өөр байр суурийг илэрхийлж байна. Ядаж л хогоо ач, цэвэрлэ, аймгийн төв, Сүхбаатар сумынхаа доторх замыг зас, халуун усны асуудлаа шийд зэрэг сэтгэгдлийг харахад Нутгийн удирдлагын ордонг засах нь НЭН ЧУХАЛ ажил биш л харагдана.

Аймгийн иргэдийн саналыг авч нэн шаардлагатай хийх ажлаа эрэмбэлдэг баймаар. Гэтэл Аймгийн хэдэн дарга нар, ИТХ-ын төлөөлөгчид өөрсдийн тухлах байшингаа засаж, янзлах нь нэн чухал хэмээн хэлж байгаа нь үнэхээр Сэлэнгэ аймгийг хөгжүүлэх сэтгэл тэдэнд дутаж байгааг илтгэнэ.

Сэлэнгэ аймгийн засаг дарга Н.Лхагвадоржийн хэт үрэлгэн болоод тансаглалын талаарх мэдээллийг дараагийн дугаарт хүргэх болно.

Төр.мн

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.