Ашиг сонирхлын зөрчилтэй ажиллаж буй Дашбалбар сумын засаг дарга Ж.Ёндонжамцыг ОГЦРУУЛАХ асуудал хөндөгдлөө

Админ I Төр.мн

2022-11-30

Энгийн иргэд тэтгэврийн насанд хүрсэн бол ажлаасаа авралгүй чөлөөлөгдөж, хүүхдүүдийнхээ гарыг харж амьдардаг. Гэтэл дарга нар тэтгэвэрийн насанд хүрсэн ч үргэлжлүүлэн даргалсаар байна.

Тухайлбал, Дорнод аймгийн Дашбалбар сумын Засаг даргын сэнтийд насаараа заларсан Ж.Ёндонжамц "Шинь Шинь" ХХК-аас тэтгэвэртээ гарсан ч дахин Засаг даргаар томилогдож, ашиг сонирхлын зөрчилтэйгөөр ажиллаж байна.

Тэрбээр ИТХ-ын нээлтэн дээр ухаан алдаж, эмнэлэгт түргэнээр хүргэгдэж байсан аж. Гэвч энэ албан тушаалтай зууралдаж байгаа нь Хятадын "Шинь Шинь" ХХК-тай шууд холбоотой гэж нутгийнхан нь харддаг юм.

Тэгвэл Дашбалбар сумын ИТХ-ын дарга н.Бат-Оргил 2021 оны хоёрдугаар сард ИТХ-ын ажлын албаны ажилтныг үүрэгт ажлаас нь чөлөөлж, сумын Ардчилсан намын дарга Б.Билгүүнийг ИТХ-ын даргын орон тооны зөвлөхөөр томилсон байдаг. Төрийн хэмнэлтийн тухай хуулийн дагуу зөвлөхийн орон тоо хасагдсан ч шинээр архив бичиг хэргийн ажилтны орон тоог бий болгож Б.Билгүүнийг томилжээ. Энэ нь Төрийн хэмнэлтийн тухай хуулийн 5 дугаар зүйлийн 5.4 заалтыг зөрчсөн гэж үзэх үндэслэлтэй юм. Б.Билгүүн нь дээрх албан тушаалд томилогдсон ч ажлын байрандаа ажлаа хийгээгүй атлаа сул цалин авч байгаа нь Монгол Улсын холбогдох хууль тогтоомж зөрчиж байна гэдгийг эх сурвалж мэдээлсэн юм.

Түүнээс гадна түүний хамаарал бүхий хүн гэгддэг Чух багийн Засаг дарга Ж.Даваасүрэн нь ажлаа хийдэггүй гэж шүүмжлүүлдэг. Энэ хоёр албан тушаалтныг өдийг хүртэл өөгшүүлсэн хүн бол Дашбалбар сумын Засаг дарга Ж.Ёндонжамц аж.

Ж.Ёндонжамцтай холбогдох хятад компанийн хаягдал усны далан шүүрч, химийн хорт бодис алдагдаж, Дашбалбар сумын нутагт химийн хорт бодис гол болон хөндий талаар урсаж байхад, тэрбээр "Тийм зүйл болоогүй" гэх тайлбар өгсөн байдаг.

Нутгийн иргэд "Дашбалбар сумын ард иргэдийнхээ төлөө ажилладаггүй, гадны гар хөл болсон" гэж нутгийнхан нь илт дургүйцдэг удирдлагыг Дорнод аймгийн Засаг дарга М.Бадамсүрэн та хэдий болтол өөгшүүлэн хамгаалах юм бэ? Энэ хүнээс хариуцлага нэхэх чадваргүй бол аймгийн удирдлага танаас хариуцлага нэхье" хэмээн дуугаа нэгтгэж байна.

Нийт сэтгэгдэл 0

! Анхаар! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд tur.mn сайт хариуцлага хүлээхгүй.